Cesare Colonnese nase a Trento el 22 Otobre del 1963. El pasa i so primi ani in questa sità ma po’ co’ ła so famegia se spostarà andando a viver a Venesia.

Co’l riva a Venesia el gà sinque ani. Xe qua ch’el taca aver la so vita cresendo e avendo i so amighi, so fradeło de nome Leonardo più grando de łù de un ano, avendo cussì ‘na infansia senplice e fełise. El frequenta scołe d’obligo e superiori. No’l gaveva pasion par le materie tecniche. Ła pasion ghe riva quando darente a Diego Della Palma el scoverxe de aver la pasion pa’l truco (dito anca Make up da l’inglexe).

Cesare gà un caratere dal tenperamento ‘verto e afabiłe e cussì el se incorxe che ła so véna xe creativa. Cussì ben presto el deventa ła spała de sto famoxo “vixagista de łe dive famoxe” e el pasa qualche ano a darghe consegi su come uxar el truco nei sałoni de bełésa e ne łe profumarìe. Sucesivamente el laora anca nel sinema, co’ atori de suceso. El se incontra co’ atori famoxi, cantanti e xornałisti cofà par exenpio : Stefano Accorsi, Bruce Willis, Pupo, Rosanna Cancellieri, Ornella Vanoni.

Ma come carateristica de tanti artisti Cesare no se sente ancora conpleto e cussì un dì el recita un monołogo e tuto co’ ‘na spontaneità e ‘na espresion so’l volto che subito ghe permete de otegnìr un gran suceso. El intra in sena squaxi par xogo ma queła spontaneità e queła naturałésa che ło desferensia ghe da rapdiamente un gran suceso e ‘l publico speso ai so spetacołi risponde senpre prexente.

A volte, co’l recita, el xe pien de sarcasmo, ma anca ironico e otimista dei nùmaroxi problemi che gà ła sità łagunàr. El raprexenta i “tipi de venesiani” de ancùo co’ i so tic e łe so manìe che vien proposti in divertenti monołoghi par exenpio nel spetacoło “Dove ti xe?” in cui vien raprexentà ‘na sureałe conversasion al tełefonìn, spetacoło divixo in do ati. Intervistà anca ne ła Rubrica “Settimanale” del tełegional regional del Veneto, el gà espreso che ama recitar contando del so sentimento par Venesia, el modo de viver che gà i venesiani e i nùmaroxi canbiamenti che gà subìo o che subìse sta sità. Da ricordàr la so conparsa in ocaxion del finto “funeràl” (14 novenbre 2009) par la spopołasion de Venesia organixà dai amighi del sito Venessia.com da senpre atento ałe problematiche de ła sità łagunàr.

Tratto da Wikipedia